港產菜芯王子 遠征寧夏
2012年08月02日
醒字派 Next Mag
出生農業世家的大學生楊曉華、張國斌及楊家榮，自組公司，繼承父業，在寧夏及惠州建立菜芯王國，立志以務農為家族基業，世代留傳。
農業及農民在金融掛帥的香港，已成為稀有名詞。
但是，三個分別在香港及英美大學畢業､土生土長的香港人，不但繼承父業做農民，更遠赴荒蕪的大西北——寧夏中 衞市種菜。
http://ramsss.com/hk
公司名叫高原農業，掌舵的是一對堂兄弟，大哥楊曉華（ Peter，三十六歲）管生產，二哥楊家榮（ Danny，廿九歲）管銷售。他們種的「火舞」菜芯，每日千里迢迢，運到香港及珠三角的菜市場。
父輩開始，便習慣在城市邊緣謀生，由新界撤退至深圳，再到惠州､寧夏。
表面在「退」，實質卻在「進」。
三千畝農地､機械化輔助，每日有數以十噸計的蔬菜供應香港及珠三角。
做一個現代化農民，一樣可以發圍。長駐寧夏､曬得黝黑的 Peter自豪道﹕「種菜係可以養妻活兒並世代相傳嘅基業。」
菜田鋪設了地下管道，連接通往黃河的水管，透過全自動灑水系統進行灌溉。
時值盛夏，香港街市菜檔有不少來自寧夏的蔬菜，價錢比冬天當造的廣東菜芯貴。
高原農業的農場位於寧夏中 衞市安寧村，海拔約一千二百米，香港沒有直航，由深圳坐四小時飛機，到達寧夏首都銀川，再開兩個多小時車才到農場。
進村後，路旁是一望無際的菜田，地上的噴射式灑水器不停地旋轉着。再往前走，一陣糞臭味飄進車內，一架拖拉機式的施肥車在田上慢駛着，掀起陣陣沙塵。
「係雞屎同豆腐渣，我哋用嘅係有機肥。」身穿 T恤短褲，腳踩 Crocs膠涼鞋的 Peter邊開車邊說：「每造菜收割後，會俾塊地抖十日，施肥後再種另一造菜。」不久，看見一片綠油油的菜田，數十名農婦蹲在田間採摘蔬菜。「除咗摘菜外，其他程序已經機械化，好像澆水、施肥等，我哋算係呢一帶最早機械化嘅農莊。」 Peter笑說。
農場佔地三千畝，相等於二百八十五個足球場，劃分成八十八塊菜田，以種植葉菜為主，除了菜芯，還有芥蘭､白菜仔等。夏天日夜溫差大，日照時間長，晚上八點才開始天黑。白天溫度約為攝氏三十度，夜晚可降至十九度，紫外線指數高，記者正午時在陽光下站了約半小時，下午即出現輕微中暑，頭痛兼噁心。
Peter父親看中的正是這裡的天然環境，○六年在當地開設農場。「菜芯要喺唔高溫、唔太濕嘅環境下成長，呢度日頭氣溫雖然高，但日夜溫差有成十幾度，蔬菜喺夜晚可減少呼吸，養分唔易流失，菜芯特別甜。」 Peter說，還有就是雨水少，「中 衞降雨量低至每年二百毫升，可減少暴雨帶來的損失。」
三大供港葉菜
#俗稱「白菜仔」，品種起源於香港粉嶺鶴藪（音：斗）村，因而得名。
*蔬菜統營處資料，由 7月 23日至 7月 29日的一週平均批發價。
菜名：鶴藪白#
批發價（斤）*：$4.7
成長周期：約 30日
菜名：菜芯
批發價（斤）*：$4.4
成長周期：約 40日
菜名：芥蘭
批發價（斤）*：$5
成長周期：約 60日
南北菜芯王國
菜芯原產地在廣東，冬天才當造，近年菜場北移後，到夏天，香港街市菜檔隨處可見寧夏菜芯。「我哋將廣東種子帶過來種，呢度嘅人先知乜嘢係菜芯。」 Peter說，選擇到寧夏做開荒牛，是父親的決定。
Peter和 Danny的父親五、六十年代由廣東揭陽偷渡來港，在新界落地生根，種菜維生。八十年代北上深圳開農場，種菜供港。隨着深圳不斷城市化，耕地被回收，農場被迫內遷，九十年代初在惠州租下數千畝地種菜。
「廣東省雨水多，又熱，尤其係夏天，菜田成日失收，爸爸佢哋就諗向西北發展，貪其氣候乾燥、氣溫唔太高。」 Peter表示，寧夏位於中國中西部､黃河上游，父親等睇中當地以農業為主，盛產枸杞、小麥等，農業配套設施較佳，於○六年租下三千畝農地。
「當地政府鼓勵外商來投資，由他們出面同農民傾，我哋先可以集合到咁多土地。」 Peter指，他們向農民租地，租期約八至十年，每畝地年租金約七百至八百元人民幣。
雖是子承父業， Peter卻決心做個現代化農民。寧夏及惠州的農場分別由父親､叔父及姑姐三家人持有。○八年， Peter找來堂弟 Danny及表弟 Ken，三個家庭的代表一同成立高原農業，將農場運作企業化，並創立品牌「火舞」。
「我哋算係第一批外來種菜嘅農民，之後越來越多人，包括香港人來寧夏種菜，做品牌有助客人辨認及推銷。」 Peter笑指取名靈感來自 TVB○七年播映的劇集——《火舞黃沙》，「好多人都唔知寧夏喺邊，套戲係喺寧夏拍，可以同人講 啲菜由套劇嘅拍攝場地來嘅。」
摘菜是唯一難以機械化的工序，十分難請人，農場的女工來自不同省份，個個都曬得黝黑，每月人工由三千元至五千元不等。
菜芯種子部分來自廣東，有時因應天氣，會改用抗病力較高的紐西蘭及日本種子。
工廠式種菜
第二代上場，最大挑戰是「勞工荒」。「我哋出到四、五千蚊人民幣一個月，包吃包住，都好難請人。新一代情願去工廠打工，賺一千幾百，都唔肯耕田，啲父母亦唔想仔女走務農嘅路，寧願將 啲田租出去。」 Peter無奈道。不過，有危亦有機。○八年中國政府推出三大政策鼓勵農耕，包括寬免農業企業所得稅、銷售稅及過路費（指高速公路收費）。「做農業嘅成本大大降低，我哋覺得可以發大來做。」 Peter自信道，因此，三子埋頭研究將種菜機械化。
「播種機同施肥機都係外國進口，人哋用來播薯仔，我哋用來播菜種，要自己改機。」 Peter帶記者參觀菜田，全部裝有自動灑水灌溉系統，用的是黃河水。
另外，就是生產流程標準化，將三千畝地劃分成八十八塊田，每塊田按翻土、施肥、播種、澆水、噴農藥、收割等流程，記錄在電腦中。「以菜芯為例，每造由播種到收成約為四十天，之後塊田會休息十天。不同菜生長時間唔同，經過計算，每日都會有菜田播種及收成。」雖然如此， Peter每天一早起床，仍要先看天氣預報，「無可能計到盡，落大雨､甚至落冰雹，又要重新計過。做農民，始終都係睇天做人。」
家族同時經營南北兩個農場。寧夏菜地的耕種期只有半年，由五月至十一月，十一月至四月則是是惠州農場的耕種期，其間摘菜工人都隨着耕作輪轉而兩邊走。「寧夏冬天落雪種唔到嘢，惠州夏天太熱，不適合種菜，但會種水稻。我哋好像候鳥咁，跟住天氣兩邊走。」 Peter指現時農場有二百名工人，都是外省勞工，不少是夫婦，男的操作機器，女的摘菜，有的更把兒女帶在身邊，「工廠唔容許工人帶小朋友返工，為咗容易請人，我哋幫佢養埋小朋友。」 Peter說。
運送菜芯需要發泡膠箱，寧夏買不到，農場買了三部機器，自行生產。
由外國引入的施肥機，用的是由雞屎及豆腐渣合成的有機肥。
坐三日車始到港
寧夏的氣候利於種菜，但運輸費卻十分昂貴。菜芯經陸路南下，由出車到香港長沙灣的批發中心，要三日時間，保鮮成為首要功夫。
「蔬菜嘅保鮮期只得七日，採摘後先入雪房冷凍，再入箱，已用咗一日，再由有冷藏系統嘅貨櫃車運港，又用咗三日，經批發市場到零售商又要一日，到街市菜商手上，剩低兩日賣菜。」 Peter一輪嘴道，
每斤寧夏菜芯的成本約四元，當中四成花在運輸上。現時平均每日有一車菜供港，約為二十一公噸，約佔農場收成的兩成，其餘供應珠三角地區。
「內地越來越少人耕種，對菜芯嘅需求有增無減，又唔使交稅，香港仲要俾企業所得稅。仲有內地一斤等於五百克，香港一斤等於六百克，單係呢一點，供應菜俾內地又比香港着數啲。」 Peter數着手指道。
Danny負責香港的推廣，在寧夏菜芯抵港後，會在長沙灣的蔬菜批發中心幫忙銷售工作。
菜場向環保回收商購買膠樽，裝水後冷凍成冰。每箱菜放入兩支，密封後便變成土法雪櫃。
每箱菜都要先量度溫度，確定在十度以下，才放進貨櫃，確保蔬菜不會在運送途中因箱內氣溫過高而變壞。
農民從沒被淘汰
Peter、 Danny及 Ken都是新一代有大學學歷的農民，他們指小時候一放假便會去農場幫忙，耳濡目染，養成對務農的興趣。在浸大修讀物理的 Peter，畢業後曾在一間美國公司做機械採購，○三年正式轉行做農民。至於三十歲未到的 Danny，曾在美國大學修讀經濟，○八年返港後，便全職到農場幫忙，主力負責香港的推廣，如供菜予稻香集團旗下的餐廳。
性格活躍的他閒時喜歡玩車及開飛機，難頂寧夏生活。「呢度 啲食物太熱氣，住兩個星期已爆晒瘡。」 Danny摸着臉笑道。至於在英國大學修讀市場推廣的 Ken，去年畢業後才正式加入公司，現在惠州農場實習。
每年五到十一月， Peter有一半時間留在寧夏，過着日出而作，日入而息的農民生活。「朝早六點起身，朝早整理訂單，下午巡菜場，日日如是。」農場放眼盡是菜田，離最近的中 衞市中寧縣約半小時車程，但他甚少離開農場，每日最大娛樂便是上網與香港的妻子用視像聊天。
「最掛住八個月大嘅仔仔，希望佢第時可以接班做落去。」 Peter一臉憨厚地笑着補充道﹕「其他工廠始終會面對被淘汰嘅一日，你睇吓 Nokia、 Ericsson手機，以前個個都用，家陣唔係 iPhone就係 Samsung。農產品係生活嘅必需品，係一個可以世代相傳嘅實業。」
「信譽農場」助港商響朵
菜統處每年都派專員探訪信譽農場至少兩次，監察農場用的肥料及農藥，並抽取泥土、水及蔬菜樣本回港化驗，以確保供港蔬菜安全。
漁農署及蔬菜統營處為幫助一眾在內地開農場的港商，於九四年推行「信譽農場」計劃，港商或內地的農場均可自願性參與。成員可獲技術支援，如病蟲害管理技術、農藥使用等，但亦要接受署方的監察，包括定期抽驗泥土、水及蔬菜樣本。
楊曉華家族經營的農場全屬「信譽農場」，菜場在蔬菜採摘前一星期便停施農藥，亦會在採摘蔬菜前進行農菜殘餘檢測。現寧夏共有八個「信譽農場」，香港菜聯社有檢測專家駐守當地，每星期抽驗疏菜，再交由香港蔬菜統營處在長沙灣的實驗室化驗。根據菜統處記錄，現時平均每天有超過一百公噸蔬菜來自寧夏，當中四十四公噸來自信譽農場。
計劃每兩年會組織交流團，往國外農場考察，以往曾到日本、南韓、美國及紐西蘭等，今年年底暫定前往意大利。
撰文：黃秋娥（寧夏）
攝影：嚴寶權（寧夏）
No comments:
Post a Comment